نەبوونی دەرمانە سەرەکییەکان و گرانبوونی لەڕادەبەدەری نرخەکەی، نەخۆشانی شێرپەنجە لە پارێزگای ورمێ تووشی قەیرانێکی مرۆیی قووڵ کردووە.
لە کاتێکدا کە نەخۆشان لەگەڵ ئازاری جەستەیی شێرپەنجە دەجەنگن، ئێستا خەمی دابینکردنی دەرمانی شیمیایی و دەرمانە تایبەتەکان بووەتە ڕەنجێکی دوو هێندە بۆ خۆیان و بنەماڵەکانیان؛ بە جۆرێک کە پچڕانی پرۆسەی چارەسەری، ژیانی هەزاران کەسی خستووەتە مەترسییەوە.
بەپێی ڕاپۆرتی هەواڵدەریی "ئیلنا"، ڕێڕەوی ناوەندە دەرمانییەکان و دەرمانخانە تایبەتەکانی ورمێ، ئەم ڕۆژانە پڕن لەو نەخۆشانەی کە بەهۆی کەمیی دەرمانەوە تووشی دڵەراوکێیەکی قووڵ بوون.
زۆربەی دەرمانە سەرەکییەکان لە ناوەندە فەرمییەکاندا دەست ناکەون و تەنیا لە بازاڕی ڕەشدا بە نرخێکی گران دەفرۆشرێن؛ ئەمەش بنەماڵە هەژارەکانی ناچار کردووە بۆ کڕینی دەرمان، کەلوپەلی ناوماڵ و داراییەکانیان بفرۆشن.
دکتۆر وەلیزادە، پسپۆڕی شێرپەنجە، ئاماژە بەوە دەکات کە لەم جۆرە نەخۆشییانەدا بەردەوامیی چارەسەری کارێکی بنەڕەتییە و هەر دواکەوتنێک کاریگەریی دەرمانەکان کەم دەکاتەوە.
هاوکات ٥ هەزار نەخۆش بەهۆی بێدەرەتانی لە نەخۆشخانەی خێرخوازی "ئومید" لە ورمێ چارەسەری خۆڕایی وەردەگرن.
