فەرماندەیی ناوەندیی ئەمریکا (سێنتکام) ڕایگەیاند هێزە دەریاییەکانی ئەو وڵاتە لە چوارچێوەی هەڵمەتی جێبەجێکردنی گەمارۆی دەریایی سەر کۆماری ئیسلامیی ئێراندا، تا ڕۆژی هەینی ٢٠ی خەرمانان، ڕێڕەوی ٩٩ کەشتیی بازرگانییان گۆڕیوە تا دڵنیا ببنەوە لە پێبەندبوونی تەواویان بە بڕیارەکان.
سێنتکام لە بڵاوکراوەیەکدا لە تۆڕی کۆمەڵایەتیی ئێکس ئاشکرای کرد کە گرووپی ئامادەباشیی ناوگانی جەنگیی ئاوی-وشکانیی (USS Boxer) و یەکەی ١١ی هێزەکانی دەریایی لە ئۆپەراسیۆنە سەربازییەکانیان لە ناوچەکەدا بەردەوامن.
ئەم پێشهاتە نوێیە لەکاتێکدایە کە ئەرتەشی ئەمریکا لە ئۆپەراسیۆنەکانی بە مەبەستی پەکخستنی تواناکانی تاران لە گواستنەوەی کەلوپەل و هەناردەکردنی نەوت لە ڕێگەی دەریاوە بەردەوامە، ئەمەش لە سایەی بەرزبوونەوەی بێوێنەی ئاڵۆزییە ناوچەییەکاندایە.
لەلایەکی دیکەوە، بازاڕەکانی نەوت و کەشتیوانیی جیهانی لە ڕەوشێکی پڕ لە نیگەرانیدا دەژین، بەتایبەت کە ئاڵۆزییەکانی یەمەن و بەئامانجگرتنی ڕێڕەوە ئاوییە سەرەکییەکانی وەک گەرووی هۆرمۆز و بابولمەندەب مەترسیی زۆریان بۆ سەر بازرگانیی جیهانی دروست کردووە.
