دۆناڵد ترامپ، سەرۆککۆماری ئەمریکا، ڕۆژی یەکشەممە ٣١ی جۆزەردان لە پەیامێکدا لە تۆڕی کۆمەڵایەتیی "ترووس سۆشیاڵ"، داوای لە کۆماری ئیسلامیی ئێران کرد کە دەستبەجێ پاشەکشە بە هێزە نیابەتییەکانی خۆی لە لوبنان لە نانەوەی بشێوی و دروستکردنی گرژی بکات.
ترامپ لەمبارەیەوە نووسیویەتی: "ئێران دەبێت دەستبەجێ هێزە نیابەتییەکانی لە لوبنان کە پارەیەکی زۆریان پێ دەدرێت لە دروستکردنی سەرئێشە و کێشە دوور بخاتەوە."
ناوبراو هۆشداریی دا کە ئەگەر کۆماری ئیسلامی ئەم کارە نەکات، ئەمریکا جارێکی دیکە ئێران دەکاتەوە ئامانج و ئەگەر هێرشە بژرێت، زۆر "قورستر" لەو هێرشەی دەبێت کە حەفتەی ڕابردوو کرایە سەری.
سەرۆککۆماری ئەمریکا لەم پەیامەیدا زانیاریی زیاتری لەسەر ناسنامەی هێزەکان لە لوبنان یان جۆری کردەوە سەربازییەکە نەخستووەتە ڕوو.
دەوڵەتی ترامپ لە ڕۆژانی ڕابردوودا نیگەرانیی خۆی لە بەردەوامیی شەڕ و پێکدادانەکان لە لوبنان دەربڕیوە و ڕایگەیاندووە کە ئەم ڕەوتە دەتوانێت کاریگەریی نەرێنی لەسەر دانوستانە لەرزۆکەکانی نێوان واشنگتۆن و تاران دابنێت.
