هێزە ئەمنییەتییەکانی ئیتلاعاتی سپای پاسداران لە بۆکان، کەسێکیان بە ناوی "ئەمیر یووسفی" بە شێوازێکی سەرەڕۆیانە و بەبێ بەڵگەی یاسایی دەسبەسەر کردووە و بۆ یەکێک لە گرتنگە ئەمنییەتییەکانی ڕێژیم لە ورمێ گواستووەتەوە.
بەپێی ڕاپۆرتی ڕێکخراوی مافی مرۆڤی "کوردپا"، ئەمیر یووسفی کە نیشتەجێی گوندی "سەلامەت"ی سەر بە بۆکانە، سەرەڕای تێپەڕبوونی ٧ ڕۆژ لە گیرانی، تا ئێستا چارەنووسی نادیارە و لە مافی دەستڕاگەیشتن بە پارێزەر و چاوپێکەوتن لەگەڵ بنەماڵە بێبەش کراوە.
ئەو هاونیشتمانییە دەستبەجێ دوای قۆڵبەستکردنی، لەلایەن هێزە ئەمنییەتییەکانەوە بۆ یەکێک لە گرتووخانە ئەمنییەتییەکانی شاری ورمێ گوازراوەتەوە.
شایانی باسە کە تا ئێستا لە هۆکاری دەسبەسەری و تۆمەتە وەپاڵدراوەکان دژی ئەمیر یووسفی هیچ زانیارییەک لەبەر دەستدا نییە.
