لە شەپۆلێکی نوێی هێرشەکان بۆ سەر ئێران، ئەرتەشی ئیسرائیل زنجیرەیەک هێرشی ئاسمانی و موشەکیی قورسی کردە سەر ناوەندە سەربازی و ستراتیژییەکانی ئێران لە تاران و چەندین پارێزگای دیکە، کە بەهۆیەوە زیانی گیانی و ماددی زۆری لێکەوتەوە.
بەپێی زانیارییەکان، لە شەوی دووشەممە و بەرەبەیانی سێشەممە ١٨ی خاکەلێوە، شارەکانی تاران، ورمێ، تەورێز، ئیسفەهان، ئەهواز، قوم و مەشهەد کراونەتە ئامانج.
ئەرتەشی ئیسرائیل ڕایگەیاند کە لەم ئۆپراسیۆنەدا سێ فڕۆکەخانەی گرینگی تارانیان بۆمباران کردووە و دەیان فڕۆکەی شەڕکەر، هێلی کۆپتێر و ژێرخانی سەربازیی کۆماری ئیسلامییان تێک شکاندووە.
لە پارێزگای ورمێ، فڕۆکەخانەی ورمێ و چەند ناوچەیەکی شاری خۆی کراونەتە ئامانج.
هاوکات لە پارێزگای ئیسفەهان، فڕۆکەخانەی کاشان و ناوچەی مەهیار کراونەتە ئامانج؛ پێوەندییە گشتییەکانی ئەرتەشی ئێرانیش پشتڕاستی کردەوە کە لەم هێرشانەدا چوار ئەفسەری هێزی زەمینی ئەرتەش لە ناوچەی مەهیار کوژراون.
ئەم هێرشانە زیانی زۆریان بە کەرتی مەدەنی و ژێرخانی ئابووریش گەیاندووە. لە ناوچەی "قەڵعەمیر"ی تاران، کوژرانی ١٥ کەس ڕاگەیەندراوە.
هەروەها لە باشووری ئێران، ئیسکەلەکانی قیشم و جاسک و شیرکەتەکانی کەشتیسازی لە خوڕەمشار پێکراون کە تێیاندا چەندین کەس کوژراو و بریندار بوون.
