وەزیری خەزێنەداریی ئەمریکا ڕایگەیاند بەهۆی ئۆپەراسیۆنی "گۆشەگیرکردنی ئابووری"ی وڵاتەکەیەوە، گۆشەگیرکردنی ئێران خەریکە دەگاتە ئاکام و سزاکان هێڵە ئاسمانییەکان و بانکەکانی تارانی گرتووەتەوە.
سکات بێسێنت لە ئیکس نووسیویەتی: "تیمەکانمان ڕوانەی وڵاتان کرد تا داوای هەڵوێست دژ بە ئێران بکەن و ئەم هەوڵانە لەئێستادا سەرکەوتوو بوونە."
بێسێنت ئاماژەی بەوە دا تورکیە، عومان و ئیمارات گەشتە ئاسمانییەکانی ئێرانیان ڕاگرتووە و بانکە گەورەکانی تورکیە و ئیماراتیش مامەڵە داراییەکانیان لەگەڵ تاران بەستووە.
ناوبراو جەختی کردەوە زیانە ئابوورییەکان تا ئاستێک بوون بەرپرسانی ئێرانیش دانیان پێدا ناوە و بەهای ڕیاڵ بۆ نزمترین ئاستی مێژوویی داڕماوە.
وەزیری خەزێنەداریی ئەمریکا سپاسی بریتانیا، تورکیە، عومان و ئیماراتی کرد و وتی بۆ ڕێگریکردن لە هەنگاوەکانی تاران دەبێت کاری زیاتر بکرێت.
بەپێی ڕاپۆرتی "واڵستریت ژۆرنال"، جان بێرک جێگری وەزیری خەزێنەداریی ئەمریکا، بۆ وەگەڕخستنی "ڕۆژی دەی ئابووری" (Economic D-Day) دژ بە تاران، سەردانی ڕۆژهەڵاتی نێوەڕاست و ئورووپای کردووە و وەزارەتەکەی لەگەڵ زیاتر لە ٥٠ وڵاتدا گفتوگۆی ڕاستەوخۆی کردووە.
