نزیکەی ٨۰ وڵاتی جیهان ڕۆژی پێنجشەممە ٢ی ڕەزبەر، لە ڕاگەیەندراوێکی هاوبەشدا، داوای کردنەوەی دەستبەجێ و تەواوی گەرووی هۆرمۆزیان کرد و هێرشەکانی ڕێژیمی ئێران و حوسییەکان لە ناوچەکەدا، هەروەها تێکدانی بازرگانی نێودەوڵەتی و ئاسایشی جیهانییان مەحکووم کرد.
بەپێی ڕاپۆرتی ڕۆیتێرز، عەبدولەتیف بن ڕاشید ئەلزەیانی، وەزیری دەرەوەی بەحرەین، ڕاگەیەندراوای ئەو ٨٠ وڵاتەی لە نەتەوە یەکگرتووەکان خوێندەوە.
زۆربەی وڵاتانی عەرەبی کەنداو و زلهێزە ڕۆژاواییەکان لە لایەنگرانی ئەم ڕاگەیەندراوە بوون.
لە ڕاگەیەندراوەکەدا هاتووە: «کردەوەکانی کۆماری ئیسلامی لە گەرووی هۆرمۆزدا هێشتا هەڕەشە بۆ سەر ئاسایشی نێودەوڵەتی و ماف و ئازادییەکانی کەشتیوانین».
واژۆکاران جەختیان لەسەر پێویستیی پەڕینەوەی سەلامەت، ئارام و بێ کۆسپ بۆ کەشتییەکان لەم ڕێڕاوە ئاوییەدا کردەوە.
هەروەها ئەم وڵاتانە بڕیاری حوسییەکانیان بۆ دەستپێکردنەوەی پێکدادانەکان لە یەمەن، هێرشە بەردەوامەکان بۆ سەر عەرەبستانی سعوودی و هێرشی «سەرەڕۆیانە» لە دەریای سووردا بەتوندی مەحکووم کرد و هۆشدارییان دا کە پێشڕەویی ئەم گرووپە بەرەو گەرووی بابولمەندەب، مەترسییەکان بۆ سەر کەشتیوانیی نێودەوڵەتی، ئاسایشی دەریایی و بازرگانی جیهانی زیاد دەکات.
لە ماوەی یەک مانگی ڕابردوودا ڕێژیمی ئێران بە تەواوەتی لە پێوەندییە جیهانییەکان دابڕاوە و لە قەیرانی قووڵی دیپلۆماسیدایە.
