کۆمەڵێک لە پەرستاران و کارمەندانی کەرتی تەندروستی لە کرماشان، لە ناڕەزایەتییەکی مەیدانیدا لە بەرانبەر زانکۆی زانستە پزیشکییەکان، داوای جێبەجێکردنی داواکارییە دارایی و پیشەییەکانیان کرد.
بەپێی ڕاپۆرتی ڕێکخراوی مافی مرۆڤی "هێرانا"، ڕۆژی سێشەممە ۱۷ی خەرمانان، کۆبوونەوەیەکی ناڕەزایەتی لەلایەن پەرستاران و کادرەکانی تەندروستیی کرماشان لەبەردەم زانکۆی زانستە پزیشکییەکانی تاڵەقانیی ئەو شارە بەڕێوە چوو.
بەشداربووانی کۆبوونەوەکە بە بەرزکردنەوەی دروشمی ناڕەزایەتی، داوای باشترکردنی دۆخی بژێوی و چارەسەرکردنی کێشە پیشەییەکانیان کرد.
بە وتەی پەرستارە ناڕازییەکان، ماوەی نزیکەی ساڵێکە مووچەی پەیوەندیدار بە کارکردنی زیادەکارییەکانیان پێنەدراوە و سەرەڕای بەردەوامیی خزمەتگوزاری، کێشەی مافە ڕەواکانییان هێشتا چارەسەر نەکراوە.
ئەم کۆبوونەوەیە لەکاتێکدا بەڕێوە دەچێت کە ڕۆژی یەکشەممە ۱٥ی خەرمانانیش، ژمارەیەک لە پەرستاران و کارمەندانی کەرتی تەندروستیی پارێزگای سنە لەبەردەم پارێزگاریی ئەو شارە کۆ بوونەوە.
ناڕەزایەتیی ئەو پەرستارانەش دژی خراپیی دۆخی بژێوی، دواکەوتنی مووچە، کەمیی هێزی مرۆیی و نەبوونی بەڕێوەبەریی گونجاو لە زانکۆی زانستە پزیشکییەکاندا بوو.
