ئیتامار بنگۆیر، وەزیری ئەمنییەتی نەتەوەیی ئیسرائیل، لە کاردانەوەیەکدا بەرامبەر بە ڕێککەوتنی ڕاگەیەندراوی نێوان دۆناڵد ترامپ و ڕێژیمی ئیسلامیی ئێران، ڕایگەیاند کە ئەم لێکتێگەیشتنە بە هیچ شێوەیەک ئیسرائیل پێبەند ناکات.
بەپێی ڕاپۆرتی ڕۆژنامەی "تایمزی ئیسرائیل"، بنگۆیر لە بەیاننامەیەکدا بە ڕاشکاوی وتی: "ڕێککەوتنەکەی ترامپ ئێمە پێبەند ناکات؛ ئیسرائیل سەر بە ئەمریکا نییە، بەڵکوو ئێمە وڵاتێکی سەربەخۆین و خاوەنی سەروەریی خۆمانین."
ناوبراو جەختی کردەوە کە ئیسرائیل لایەنێک نییە لەم ڕێککەوتنەدا و ئەم دەقە نوێیە بە ڕێککەوتنێک نازانێت کە بتوانێت ئەمنییەتی وڵاتەکەی بپارێزێت و گەرەنتی بکات.
وەزیری ئەمنییەتی نەتەوەیی ئیسرائیل لە کۆتاییدا ئاماژەی بە دۆخی مەیدانیی شەڕ لە باکوور کرد و ڕایگەیاند کە پێویستە ئیسرائیل لە هیچکام لەو ناوچانەی باشووری لوبنان کە لە کاتی پێکدادانەکاندا لەلایەن هێزەکانییەوە کۆنترۆڵ کراون، پاشەکشە نەکات.
