بەپێی ڕاپۆرتی ئەنجومەنی سەوزی چیای مەریوان، بە مەبەستی فراوانکردنی چالاکییە پەروەردەیی و فەرهەنگییەکان و ئاشناکردنی منداڵان بە گرنگیی کتێب، خوێندنەوە و ژینگە، کۆمەڵێک لە منداڵان و مێرمنداڵانی ئەو ئەنجومەنە لە شێوەی گەشتێکی زانستی و فەرهەنگیدا، سەردانی کتێبخانەی ئاوایی سەردۆشیان کردووە.
بەپێی ئەو ڕاپۆرتە، لەم گەشتەدا منداڵان فێری گرنگیی کتێب و ڕۆڵی خوێندنەوە لە زیادکردنی هۆشیاری و باشتر تێگەیشتن لە ژینگە و سروشت بوون.
هەروەها باسکردن لە گرنگیی پاراستنی سامانە سروشتییەکان و پاراستنی ژینگە و ڕۆڵی منداڵان لە پاراستنی سروشتدا لە تەوەرەکانی ئەو گەشتە بوون.
ئەنجومەنی سەوزی چیای مەریوان ئەم گەشتە زانستی و کولتوورییەی بە دەرفەتێک بۆ منداڵان بە مەبەستی بەدەستهێنانی ئەزموونێکی فێرکاری جیاواز لە کەشێکی زانستی و پەروەردەیی پێناسە کردووە.
هاوکات کۆمیتەی منداڵان و مێرمنداڵانی ئەنجومەنی سەوزی چیا بە جەختکردنەوە لە سەر گرنگیی پەروەردەی منداڵان و بەشداریکردنیان لە وانەکانی ژینگەپارێزی، هەوڵی خۆی بۆ دابینکردنی بناغەی گەشەکردنی نەوەی داهاتوو بە ئەنجامدانی بەرنامەگەلی پەروەردەیی ژینگەیی، کولتووری و زانستی دەدات.
شایانی باسە بەڕێوەچوونی ئەم جۆرە بەرنامانە دەتوانێت بۆ بەهێزکردنی ڕۆحی بەشداریکردن و بەرپرسیارێتی یارمەتیدەر بێت و منداڵان بۆ خوێندنەوەی کتێب و پاراستنی سروشت و چالاکییە ژینگەییەکان هان بدات.
