لە شاری سەقز و بە ئامادەبوونی کۆمەڵێک لە شاعیران، نووسەران و هۆگرانی ئەدەبیاتی کوردی، یەکەمین کۆڕی شێعرخوێندن و ڕەخنە و لێکۆڵینەوە لەسەر بەرهەمەکانی شاعیری ناوداری کوردستان "مامۆستا ناری" بەڕێوە چوو.
ئەم کۆڕە ئەدەبییە لەلایەن "ناوەندی کەلتووری ـ ئەدەبیی وریشە" و لە هۆڵی کتێبخانەی گشتیی پارکی شاری سەقز ڕێک خرا.
لە سەرەتای بەرنامەکەدا، هەر یەکە لە ئەمین گەردیگلانی شاعیر و نووسەر، عەبدولخالق ڕەحمانی نووسەر و وەرگێڕ، شاعیران مەنیژە کازمی و شلێر ڕەشیدی، بە پێشکەشکاریی خالید فەتاحی، تیشکیان خستە سەر ژیان، بەرهەمەکان، پێگەی ئەدەبی و تایبەتمەندییەکانی شێعری مامۆستا ناری و چەند لێکۆڵینەوەیەکیان لەمبارەیەوە پێشکەش کرد.
لە بەشی کۆتاییی پرۆگرامەکەدا، گرووپی مۆسیقای "ئاشتی" بە پێشکەشکردنی چەند پارچە مۆسیقایەکی کوردی، کەشێکی هونەریی تایبەتیان بە کۆڕەکە بەخشی.
